is flag
is flag

Skilmálar Nýrrar erfðaskrár

Síðast uppfært 1. nóvember 2026

1. Rekstraraðili

Ný erfðaskrá, nyerfdaskra.is, er rekin í eigin nafni Bóasar Sigurjónssonar, Hagaseli 10, 109 Reykjavík. Netfang vegna þjónustunnar er boas@nyerfdaskra.is. Í skilmálum þessum vísar „Ný erfðaskrá“ til rekstraraðilans.

2. Þjónusta og verð

Heildarverð þjónustunnar er 34.900 kr., að meðtöldum opinberum gjöldum sem kunna að eiga við. Innifalið er eitt eftirtalinna verkefna:

  • Gerð einnar erfðaskrár fyrir einstakling.

  • Gerð einnar sameiginlegrar erfðaskrár maka.

  • Gerð tveggja nær samhljóða gagnkvæmra erfðaskráa maka.

Í verðinu felast gerð draga, tvær umferðir yfirferðar og breytinga samkvæmt 5. kafla, afhending lokagerðar á PDF-formi og leiðbeiningar um undirritun og vottun. Ráðgjöf að ósk viðskiptavinar vegna verkefnisins og nauðsynleg tölvupóst- og símasamskipti eru einnig innifalin á meðan verkefnið er í vinnslu.

Þjónustan miðast við gerð erfðaskrár samkvæmt íslenskum lögum. Hún felur ekki í sér ótakmarkaða eða áframhaldandi lögfræðiráðgjöf, sjálfstæða skattaráðgjöf, mat á erlendum rétti, rekstur ágreiningsmála eða framkvæmd dánarbússkipta. Verkefni sem krefjast slíkrar vinnu eru metin sérstaklega áður en þau eru samþykkt.

Undirritun, vottun og þjónusta lögbókanda eða sýslumanns eru ekki innifalin. Viðskiptavinur greiðir þann kostnað sjálfur. Ekki er stofnað til aukakostnaðar á vegum Nýrrar erfðaskrár án sérstaks samþykkis viðskiptavinar.

3. Beiðni, samningsgerð og greiðsla

Við innsendingu spurningalistans staðfestir viðskiptavinur að hann hafi kynnt sér og samþykki þessa skilmála sem grundvöll fyrirhugaðra viðskipta. Innsending spurningalista er beiðni um þjónustu og felur ekki ein og sér í sér bindandi pöntun eða greiðsluskyldu. Ný erfðaskrá fer yfir beiðnina og getur óskað eftir frekari upplýsingum eða afþakkað verkefni, meðal annars vegna umfangs, flækjustigs eða erlendra tengsla.

Sé verkefnið samþykkt fær viðskiptavinur tölvupóst með staðfestingu á því að hægt sé að taka það að sér, lýsingu á þjónustunni, verði, skilmálum og greiðsluupplýsingum. Bindandi samningur kemst á þegar viðskiptavinur samþykkir tilboðið með greiðslu. Greitt er fyrirfram með millifærslu á reikning nr. 0370-22-141452. Staðfesting samnings og móttöku greiðslu er send í tölvupósti áður en vinnsla hefst.

Vinnsla hefst eftir greiðslu og móttöku nauðsynlegra upplýsinga.

4. Afhending og frestir

Fyrstu drög eru send í tölvupósti innan sjö virkra daga frá því að greiðsla og allar nauðsynlegar upplýsingar hafa borist, nema sérstaklega sé samið um annað. Virkir dagar eru mánudagar til föstudaga, að undanskildum almennum frídögum á Íslandi.

Vanti upplýsingar eða skýringar er viðskiptavinur látinn vita. Bið eftir nauðsynlegum svörum, gögnum eða yfirlestri viðskiptavinar lengir afgreiðslutíma sem henni nemur. Ný erfðaskrá ber ekki ábyrgð á þeim hluta tafar sem stafar af slíkri bið.

Sjö virkra daga fresturinn tekur til fyrstu draga. Tímasetning lokaskila ræðst af yfirlestri viðskiptavinar og þeim breytingum sem óskað er eftir. Lokagerð er afhent án ástæðulauss dráttar þegar yfirferð og umsamdar breytingar liggja fyrir. Verði fyrirsjáanleg töf af hálfu Nýrrar erfðaskrár er viðskiptavinur upplýstur um hana og nýjan áætlaðan afhendingartíma.

Erfðaskrár eru afhentar rafrænt sem PDF-skjöl í tölvupósti. Útprentun og póstsending eru ekki innifalin.

5. Yfirferð, breytingar og lokaskil

Viðskiptavinur fær fyrstu drög til yfirlestrar og getur skilað athugasemdum. Að þeim breytingum loknum fær hann önnur drög og getur aftur komið athugasemdum á framfæri. Að lokinni þeirri yfirferð er lokagerð afhent.

Tvær umferðir athugasemda og breytinga eru innifaldar. Ekki er sett tölulegt hámark á einstakar breytingartillögur innan hvorrar umferðar, enda varði þær hið samþykkta verkefni. Viðskiptavinur er beðinn um að taka athugasemdir sínar saman í hverri umferð. Óskir sem fela í sér annað eða verulega umfangsmeira verkefni eru ræddar sérstaklega áður en frekari vinna er unnin.

Viðskiptavinur getur samþykkt drög án þess að nýta báðar umferðir. Þögn viðskiptavinar telst ekki samþykki draga.

Nýjar óskir eftir lokaskil, þar á meðal breytingar vegna breyttra fjölskylduaðstæðna eða vilja viðskiptavinar, eru sérstakt verkefni og háðar nýju samkomulagi um verð og umfang. Mistök af hálfu Nýrrar erfðaskrár eru hins vegar leiðrétt kostnaðarlaust og teljast ekki til framangreindra breytingaumferða. Lokaskil skerða ekki rétt viðskiptavinar vegna galla á þjónustunni.

6. Upplýsingar frá viðskiptavini og ábyrgð

Viðskiptavinur ber ábyrgð á að upplýsingar sem hann veitir séu réttar, fullnægjandi og uppfærðar. Það á meðal annars við um nöfn, kennitölur, fjölskyldutengsl, eignarhald, skuldir, fyrri erfðaskrár og óskir um ráðstöfun arfs. Viðskiptavinur skal tilkynna um breytingar sem verða á nauðsynlegum upplýsingum á meðan verkefnið er í vinnslu.

Ný erfðaskrá byggir vinnu sína á afhentum upplýsingum og sannreynir þær ekki sjálfstætt með uppflettingum í skrám eða öflun staðfestinga frá þriðju aðilum, nema sérstaklega sé samið um það. Viðskiptavinur skal yfirfara drög, einkum persónuupplýsingar, tilgreiningu eigna og hvort ráðstafanir endurspegli vilja hans.

Ný erfðaskrá ber ekki ábyrgð á afleiðingum rangra eða ófullnægjandi upplýsinga frá viðskiptavini að því marki sem afleiðingarnar verða raktar til þeirra. Ný erfðaskrá ber ekki ábyrgð á tjóni, fjárhagslegu eða öðru, sem kann að hljótast af gerð, túlkun eða framkvæmd erfðaskrár, að því marki sem slík takmörkun ábyrgðar er heimil samkvæmt lögum. Þetta breytir ekki því að eigin mistök eru leiðrétt kostnaðarlaust samkvæmt 5. kafla.

7. Undirritun, vottun og notkun

Afhending PDF-skjals lýkur ekki sjálfkrafa þeim frágangi sem þarf til að erfðaskrá verði gild. Viðskiptavinur sér sjálfur um undirritun og að afla lögmætrar vottunar, í samræmi við leiðbeiningar sem fylgja skjalinu. Ný erfðaskrá annast ekki vottun og útvegar ekki votta sem hluta þessarar þjónustu.

Viðskiptavinur ber ábyrgð á að ljúka þessum skrefum og varðveita undirritað frumrit með viðeigandi hætti. Ný erfðaskrá ber ekki ábyrgð á því að viðskiptavinur láti hjá líða að nota skjalið, undirrita það eða afla vottunar þrátt fyrir réttar og fullnægjandi leiðbeiningar. Sama á við um breytingar sem gerðar eru á skjalinu eftir afhendingu án aðkomu Nýrrar erfðaskrár, að því marki sem afleiðingar verða raktar til þeirra.

Þjónustan felur ekki í sér vörslu frumrits eða sjálfvirka endurskoðun erfðaskrár vegna síðari breytinga á lögum eða aðstæðum. Viðskiptavinur þarf sjálfur að óska eftir nýrri yfirferð ef tilefni verður til.

8. Afturköllun og endurgreiðslur

Eftir að greiðsla hefur verið innt af hendi og vinna við verkefnið hafist á viðskiptavinur ekki rétt á endurgreiðslu vegna afturköllunar pöntunar, breyttra óska eða þess að hann ákveði að nýta ekki erfðaskrána, að því marki sem ófrávíkjanleg lög heimila. Um endurgreiðslu þegar Ný erfðaskrá hættir við verkefni fer samkvæmt 9. kafla.

9. Verkefni sem ekki er unnt að ljúka

Komist Ný erfðaskrá að því eftir samningsgerð að verkefnið sé utan þess umfangs eða sérþekkingar sem þjónustan nær til, svo sem vegna sérstaks flækjustigs eða erlendra tengsla, er viðskiptavinur upplýstur án ástæðulauss dráttar. Ný erfðaskrá getur þá hætt við verkefnið og endurgreiðir greitt þjónustugjald að fullu, án ástæðulauss dráttar og eigi síðar en innan fjórtán daga frá tilkynningu.

Þetta ákvæði heimilar ekki geðþóttafull niðurfellingu samþykktra verkefna og skerðir ekki ófrávíkjanleg réttindi viðskiptavinar vegna vanefnda. Ekki er breytt yfir í dýrara verkefni án sérstaks samþykkis hans.

10. Persónuvernd, kvartanir og ágreiningur

Um meðferð persónuupplýsinga fer samkvæmt persónuverndarstefnu Nýrrar erfðaskrár sem er aðgengileg á vefnum.

Athugasemdum og kvörtunum skal beina á boas@nyerfdaskra.is með lýsingu á því sem talið er hafa farið úrskeiðis. Leitast er við að leysa úr þeim í samráði við viðskiptavin. Reynist galli á þjónustunni eru eigin mistök leiðrétt kostnaðarlaust, án þess að það útiloki önnur lögbundin úrræði viðskiptavinar.

Náist ekki samkomulag getur neytandi leitað til kærunefndar vöru- og þjónustukaupa, að uppfylltum skilyrðum um meðferð máls. Upplýsingar eru á vef nefndarinnar. Réttur til að leita til dómstóla helst óskertur.

Íslensk lög gilda um þjónustuna. Skilmálarnir takmarka ekki ófrávíkjanleg réttindi neytenda. Sú útgáfa skilmálanna sem viðskiptavini er veitt við samningsgerð gildir um verkefnið; síðari breytingar breyta ekki þegar gerðum samningi án samkomulags.